Munglai Hkyet Check Point Gate Tara Hpe Tara Shangang Masat

Ginjaw COVID-19 Ana Zinli Makawp Ninghkap Komiti kaw nna Laiza ginra hpe Ana hkoi san ai shara byin hkra shakut nga ai hta Laiza de shang ai Munglai Hkyet Check Point Gate hpe August (15)ya sahni kaw nna tara kahtap shangang masat ai lam nga ai hpe chye lu ai.

Maisak Pa Check Point hpe Kunrai ni hta lai nna masha pru shang hkawm sa ahkang hpe Tsep kawp pat hkum da ai rai nna, Munglai Hkyet Check point hta mung masha pru shang hkawm sa ai lam hpe pat hkum da ai lam nga ai.

Ahkyak ai mungdan magam bungli a majaw hkawm sa ra wa ai rai yang Ginjaw COVID Komiti  a ahkaw ahkang hte sha hkawm sa lu na rai nna, Si hkrung si htan machyi makaw byin nna lai shang wa ra yang Hkamja Dap a madi shadaw hte lai ahkang jaw na ai re hpe chye lu ai.

Masat da checkpoint lam hku n lai ai sha, kaga lam kaji lam masun hku nna lagu shang wa ai ni,  tara n hkan ai ni hpe Kongsi a tara hte maren ja dik ari jaw ahkyak la ai hpe hkamla ra na lam tara masat da ai.

Maisak Pa check point a shinggan daw hpe COVID ana kap bra ai Ntsen nhten shara Black Area hku masat nna, Maisak Pa kaw nna Munglai Hkyet Check point du hkra gaw Brown Area hku masat da ai. Laiza Ginra hpe gaw Ana hkoi san ai shara ngu masat da ai rai nna, hkoi san hkra mung shakut nga ai lam Ginjaw COVID-19 Ana Zinli Makawp Ninghkap Komiti ni kaw na chye lu ai.

Ya aten Laiza Ginra kata COVID ana numdaw (3) lang jep ai lam galaw hpang nga sai rai nna, COVID positive marai (43) hpe tsi gawn lajang nga ai lam, Ntsen nhten hkamja lam masam maram hkam nga ai masha marai (63) nga ai lam chye lu ai.

 

Leave a Reply

Your email address will not be published. Required fields are marked *