Hk.l.y (58) hpyen dap hte ni kahtep ai kaw nga ai Wuyan mare, Labang mare, Mukchik mare, Mading mare hkan na lam kaba mayan e nga ai mungshawa dum nta wang kata de Myen hpyen gumshem ni shang sawk jep ai lam galaw nga ai hpe na chye lu ai.
Hk.l.y (58) dap na hpyenla ni hte hpyen garum du wa ai ni lam mayan e nga ai nta langai hpang langai kaw shang nna nta masha htinggaw jahpan san jep ai, Ya nga ai masha jahpan jep ai, hpa baw bungli galaw ai ni jep ai nga nna dai ginra na Slg langai tsun ai kaw na chye lu ai.
Hpyendap hte ni kahtep ai mare hkan na mungshawa ni hpe kaga shara de koi yen nga na matu myen gumshem dap ni lai wa sai bat hta ndau ai majaw mare masha nkau gaw Waimaw de hprawng koi yen ai ni nga ai . Nkau gaw nta sin na masha langai daram ngam da ai ni mung gaw nga ai lam na chye lu ai.
Waimaw mare de hprawng koi yen nga ai mungshawa ni ndai bat laman tinang mare dum nta de wa gawan ai lam nga ai raitim shana shagu ngu na Hk.L.Y (58) dap ni grup grup de sinat laknak gap bang nga ai majaw tinang nta kaw n nga gwi nna mare na nawku jawng ni hte Waimaw de koi yen nga dingyang naw re hpe mung chye lu ai.