Munglai Hkyet COVID-19 Check Point Kaw Masha Lai Wa Lai Sa Pat Hkum Ding Yang Rai

Laiza Ginra hpe COVID-19 ana hkoi san ai shara byin lu na matu shakut nga ai aten re majaw Laiza Shang wa ai jahtum na gate rai nga ai Munglai Hkyet Check point kaw masha pru shang hkawm sa lam hpe ja ja pat hkum nga ai re.

Masha hpe jep chyoi ai hku n re sha Covid ana hpe madung ninghkap lu na matu Ginjaw COVID -19 Ana Zinli Makawp Ninghkap Komiti a matsun hte maren galaw nga ai re lam, Munglai Hkyet Gate yu reng lit ang ai Du Jum Myitung Naw La tsun ai.

“Mungshawa ni myit n pu ba hkra ngu nna galaw nga ai, Ndai kaw hkyak hkyak lai ra ai ni, Ginjaw COVID-19 komiti a madi shadaw laika pa lawm nlawm jep ga ai.Mare shang ai jahtum na gate re majaw kunrai mawdaw ni hta lagu makoi lawm ai masha shajan lawm n lawm hpe jep nga ai”

Hkyak Hkyak lai ra ai ni hpe gaw Ginjaw Covid Komiti a madi shadaw laika lawm nlawm, Ana makawp bu hpun palawng hkrak bu hpun sumraw ai lam nga n nga ni hpe jep ai rai nna, masat da ai aten bai du wa ai shaloi ana makawp buhpun palawng wan nat jahten ai lam, mawdaw sengke hte kunrai ni hpe tsi gat ai lam, lata kashin shangun ai lam ni hpe dau hte dau jep chyoi ai lam nga ai.

Ya aten hta Laiza ginra kata ana jep mu nna tsi gawn lajang hkam la nga ai masha marai (46) nga ai rai nna, Ntsen Nhten hkamja lam masam maram masha marai (60) hte tsi jep tawn ai masha marai mun mi (10,000)mi jan nga ai re.

 

Leave a Reply

Your email address will not be published.