Aten Kumhpa Nari Langai

Jinghku majing zawn hku hkau dik ai Hkri jan langai kaw nna Nari kumhpa akajawng sha lu la ai majaw nye myit kata kabu ai lam ni n dang tsun hkra byin shangun mat wa ai.Bai dai Nari langai madu lu la ai raitim aten hpe gaw ngai n madu lu ai ngu ai ga shadawn gasi langai hpe mung myit dum dat ni ai.

Shi na shi lai mat wa ai aten ladaw ni hta anhte shinggyim masha ni wa tinang hkum tinang m.adu lu ai ngu nna n dum shami aten hkaleng garawt ai kaw lawm sha taw nga ai kaw lawm sha taw nga ai hpe lai wa sai aten ni hta n chye kau dat ai. (Time will speaks) ngu ai ga a lachyum hpe atsawm n chye na la kau ai.Dai sha n-ga Aten gaw ga shaga wa na ra ai nga ai hpe mung kaji ten hta aten gaw ga gara hku shaga na ngu nna myit lai wa yu sai.

Kalang lang tinang hkum tinang Aten hkaleng garawt ai kaw hkan nang mat ai zawn kaga manang ni mung ngai zawn rai sha aten shalai hkan nang taw nga na re ngu shadu nngai.

Tinang a aten nhtoi ladaw ni hte marai langai ngai a aten nhtoi ladaw mahkrun masa lam lama ma ninggam hpe tawt lai ra ai aten ladaw ni hta kalang ta maja n gumhtawm lwi hkrat ai sha shara mi hta kayin taw nga na ra ai.

(Matsing)

(Dai ten hta gaw Ramma manang ni maja ra dik aten rai nga ai. Lam lahkawng na langai ngai lata ra ai ten rai nga ai)

Dai hpang gaungwi ngwi hte sha tinang a aten ladaw mahkrun hte maren matut bai lwi hkrat nga ra ai.

Dai aten ladaw Hkaleng kata hta anhte ni yawng lawm taw nga ai namlap langai zawn anhte tai nga ai. Matut lwi hkrat ai lam n nga ai sha gayin taw ai aten langai hta yawng lawm taw ai namlap ni gaw langai hte langai jahkring mi, aten kadun mi hta hkrum katut ai lam sha rai nga ai. Aten du ai hte kadai mung kade a gam maka hta maren nang ngai yawng a mani sumsai rai pyaw ai lam hten mat hkra tsan tsan de yawng lawm mat na gaw teng man ai lam re.

Kaja wa nga yang prat hkaleng ndai gaw anhte hpe langai hte langai hkrum katut nna tsawra mani sumsai shangun ai, pawt sindawng hkat shangun ai lam ni re ngu mu mada ai. Dai zawn re ni gaw myit hpe hkamsha shangun ai lam langai sha rai nna teng man ai lam n re ngu myit la ai. Bai dai zawn myit hkam sha lam a ntsa (shr) myit hkam sha lam ngut ai hpang hka bra ra ai lam ni, jahkring mi na ten hta myit dik ai, n dik ai lam ni hte a ten hkaleng a madung lam yan hpe n mu mada nga ai ngu hpe mung myit sawn lu ai.

Ndai shara hta Nari langai hpe hkap la lu ai marang e nye a myit hta kabu ai lam ni hpe tsun hpaw shagawp yang mai sai ngu mu ai. Hpa zawn n nawn ai sha nga brak hkawm ai nye prat hte kyang lailen langai hpe galai shai shangun ai lam byin wa ai. Mabyin langai ngai hpe bai nhtang sumru nna tsun hpaw na matu dai mabyin hpe zepzi n malap ai raitim aten hpe gaw malap chye ai. Aten ahkyin sha hkrak tup tsun lu ai rai yang ngai byin lai mat sai lam  gaw matsing sumhting hpa langai zawn byin mai ai nga nna manaw manang ni ngai hpe tsun dan ga yu ai.

Raitim nye matu gaw Nari langai mari nna Aten hkrak tup tsun lu na matu mung kalang mi mung n myit dum ga yu nngai. Nari gaw tinang hpe lama ma hte gyit hkang da ai ngu nna tsun dan ga yu sai ngai na Katsa langai a Ga si gaw nye Na kata hta shang mat sam ai ngu shadu ai. Dai majaw nye prat hta Nari mari lang na matu kalang mi mung n shakut ga yu ai.

Ya gaw ngai sawn sumru chye sai. Hku hkau tsawra ai Hkri jan langai kaw nna kumhpa lu la ai NARI hpe kabu gara hkap la ngut ai shani kaw nna Kaga Nari ni a aten hte bung gaw bung a ni?, Aten gaw hkrak jaw taw ai kun? Hpang hkrat mat yang gara hku di na lam ni hpe aten hpring myit sawn nga taw sai. Aten yu ai lam hpe mung chye hkra sharin la taw sai.

Dai zawn aten hte seng nna myit sawn yu ai lam law wa nna hpang jahtum nye prat hpe gara hku jahtum na, Aten kadun hta akyu rawng let gara hku sak hkrung hkawm sa na nga du hkra myit tsang wa ai. Aten kade ram sha nga sai kun? Hpa ni hkyen lajang da lu sai kun? Tinang a aten htum mat ai hpang kaning re ni hpe ngam da kau na kun? nga zawn re du hkra myit shalawm chye wa ai.

Prat hkrumlam a Aten hkaleng langai  hta hkrum kadut tsawra hku hkau hkat ai lam gaw myit simsa shangun ai lam langai rai nna, n ju n dawng manawn masham, pawt sindawng hkat ai lam ni gaw Mungkan a n simsa ai lam langai sha rai nga ai. Raitim dai zawn myit simsa lam hte myit n pyaw lam ngu ai mung galoi mung n bung hkat ai lam rai nna jahkring jahkra myit hkamsha lam hte hkam la ai lam nkau mi sha rai nga ai.

Dai hku nga yang anhte ndai prat laru hkrumlam hta hpa ni shajin nna gunhpai hkawm sa wa ra na ngu ai hpe aten NARI kumhpa yu nna myit yu ai.Aw..lani mi hkying hkum 24 aten jahkring mi lapran lama ma hkamsha lam hpe madung tawn na malai tinang a myit masa sari sadang hpe hpa majaw n gaw gap ai. Hpa majaw gaw gap la ra na n myit dai ngu ga san san ga sai.

Gara hku mi rai rai Aten minute kahtawk ni gaw, gaungwi ngwi gayin shamu nna anhte ni hpe garawt mat wa taw nga sai. Raitim anhte ni a madang hte teng man ai lam hpe hpa majaw n mu masu su taw ai kun ngu myit yu nga nngai.

NARI langai kumhpa jaw ai majaw madu lu ai wa nye matu Aten hpe galoi mung n lu madu taw nga ai. Raitim prat a adaw achyen Minute ni hpe masha ni ntsa machyi shangun na lam hta grau nna garum ningtum jaw lu na hte myit garen hkrum ai ni hpe n-gun jaw, ra kadawn nga ai ni hpe tinang dangdi ai made jahpring ya na matu, lam dam mat ai ni hpe shading  sharai  garum na hte hkru ja taw ai Wan hpe shazim sat ya lu na matu anhte yawng n hprai ai sha shakut ra ai lam re ngu myit sawn lu ai.

Ya tinang gran da ai aten ahkying chyarang ni tsa ban htawm hpang a matu ngu n tsun lu ai zawn n du n dep shi ai hpawt ni ngu ai shani ngai hpe NAYI Kumhpa jaw ai nye Ka hkri hpe dai ni Tsa Ba galaw magam bungli gaw hpawt ni mahtai rai na re yaw.. ngu tsun na re ngu NAYI hpe yu dat yang “MAWK” Hkying 11 rai mat sai gaw!

Lahpai Seng (LMR)

Leave a Reply

Your email address will not be published.