COVID Ana Jep Mu Ai Kachyi Htu Jawngma Ni Mai Tsai Hkyamsa Sai

Dingdung Ginwang Ginjaw, Sumpra Bum Ginwang Kachyi  Htu mare kaw na covid ana jep mu ai jawngma ni hpe tsi bai jep yu yang yawng Negative rai sai lam, Dingdung Ginwang Ginjaw COVID-19 Ana Makawp  Ninghkap Komiti kaw na chye lu ai.

Ana jep mu ai jawngma  yawng marai (59) rai nna, ya aten shahte hpe hkamja lam naw maram masam nga ai. Jawngma ni yawng hkamja nga ma ai. Maram masam aten hpring ai hpang tsi bai jep nna shale  na re lam lit nga Slg ni tsun ai.

Jawngma ni hta ana jep mu ai majaw Kachyi Htu mare masha ni hpe mung tsi jep ai shaloi marai (3) kaw Covid ana jep mu nna tsi gawn lajang shara kaw gawn lajang nga ai .

Dingdung ginwang ginjaw kata Sumpra Bum Ginwang hta ya aten Covid ana jep mu nna gawn lajang hkam nga ai masha, Hka Ba Quarantine Dabang kaw marai (8), Kachyi Htu kaw marai (3), yawng marai (11) nga ai. Putao Ginwang hte Njang Yang Ginwang kata hta gaw covid jep mu ai machyi masha n nga ai lam chye lu ai.

 

 

Leave a Reply

Your email address will not be published. Required fields are marked *