Sinpraw Ginwang Ginjaw Hka Lawng Kawng Hkang Zing Dabang Kaw Masha Hkapla Hpang Sai

Sinpraw Ginwang Ginjaw, Mai Ja Yang de shang wa na masha  ni hpe September (20) ya shani kaw nna Hka Lawng Kawng, Hkang Zing Dabang (Containment) kaw hkap la hpang nga sai lam Sinpraw Ginwang Ginjaw COVID-19 Ana Zinli Makawp Ninghkap Komiti kaw na chye lu ai.

Mai Ja Yang hte makau grupyin shara ni hta COVID-19 ana zinli kap bra nga sai re majaw lai wa sai shata lahkawng kaw nna Lockdown tara jahkrat da ai kaw nna, ya aten ana zinli makawp ninghkap lu wa ai madang  rai sai re majaw Lockdown hpe shayawm nna masha hkap la nga ai re lam, Sinpraw Ginwang Ginjaw COVID-19 Ana Zinli Makawp ninghkap komiti ningbaw Du Kaba Maji Zau Ring tsun ai.

Hkang Zing Dabang hta shinggan de na shang wa ai ni hpe ana jep ya ai ten laman lusha jarik tinang lit la ra na, ana jep lu ai mahtai hta hkan nna ana jep n mu ai ni hpe gaw Quarantine Dabang kaw sa na, ana jep mu ai ni hpe gaw Positive gawn lajang dabang kaw tsi gawn lajang na re hpe chye lu ai.

Hka Lawng Kawng Containment dabang hpe September (20) ya shani hpaw hpang ai rai nna, shang wa mayu ai ni Sinpraw Ginwang Ginjaw COVID-19 Ana zinli makawp ninghkap komiti de shawng shana ra na re ai lam hte, mying jahpan lawm ai ni hpe sha shang wa ahkang jaw na re lam chye lu ai.

Ya aten Mai Ja Yang kaw COVID ana jep mu nna tsi gawn lajang hkam nga ai masha marai (139) nga ai lam chye lu ai.

 

Leave a Reply

Your email address will not be published. Required fields are marked *