Wunpawng Mungdan Shanglawt Hpyen Dap KIA Masat (2) Dap Ba, Masat (14) Dap Dung Ginra Kata Gasat Gala Byin

Hugawng ginwang, BanKok hte Awng Ra mare lapran kaw dai ginra mayan shamu shamawt hkawm ai Myen hpyen gumshem hpung ni hte Wunpawng Mungdan Shanglawt Hpyen Dap KIA ni October (2) ya jahpawt daw hkying (8:20) aten daram hta gasat gala byin ai lam nga ai.

Gasat gala byin ai hpang hkying (10:00) aten hta dai Myen hpyen gumshem dap ni Mugawng hka Yuzana miwa mahkrai maga kawn (60) MM ngu maram lu ai laknak kaba gap ai majaw Wa Ra Zup mare kaw wa hkrat kapaw nna Salang Nbu Zau Hpan a lahkra lagaw magyi kaw pala hkyep hkra hkala hkrum  ai lam na chye lu ai.

October (1) ya shana de hkying (5:20) aten daram hta mung Nawng Mi mare hte BanKok lapran Mogawng hka mayan kaw shamu shamawt shang wa ai Myen hpyen gumshem hpung ni hpe KIA ni bawm hte hkap shingla gasat ai lam nga ai. Myen hpyen gumshem dap ni Wa Ra Zup mare kata de laknak kaba gap bang ai majaw Salang Hpauyu Tawng a kasha Shy.Hkawn Htoi a lata pala hkyep hkra hkala ai lam mung nga sai re.

Myen hpyen gumshem dap ni mare kata de laknak kaba gap bang ai sha n-ga mare masha ni hpe Pawta lahkawn ai lam ni mung nga ai. Wa Ra Zup mare masha ni dai mare na hkalup hpung nawku jawng wang kaw hpyen koi yen nga ai lam na chye lu ai.

 

Leave a Reply

Your email address will not be published. Required fields are marked *