Nok Mung Ginra Hta Covid Kap Bra Masha Grai Yawm Wa Sai Majaw Hkawm Sa Hkrun Lam Ni Bai Hpaw Nga

Nok Mung ginra hta COVID-19 ana zinli numdaw masum lang ngu na kap bra shadang sawng wa ai majaw hkawm sa hkrun lam ni pat tawn da ai raitim ndai hpang daw de COVID-19 kap bra masha n nga ai daram rai wa sai majaw Hkawng Lang Hpu, Putao hkrunlam hpe hpaw ya nga sai lam ginra masha ni tsun ai kaw na chye lu ai.

Lai wa sai shata hkan gaw Hkawng lang hpu, Hka Kabu, Ban Nan Din  ginra de na mung masha ni hpe Nok Mung ginra de hkawm sa ahkang pat tawn da ai re Hpang daw de  Nok mung ginra hta covid kap bra shadang yawm wa sai majaw hkawm sa mai sai raitim Nok Mung kaw na shagyit hpe gaw garai ndawm ai Nok Mung, Hkawng Lang Hpu,Hka Kabu, Ban Nan Din ginra na mung masha ni, hkawm sa hkawm wa n mai ai majaw shang gumhpraw n nga nna grai yak hkak mat ai nga nna ginra masha langai tsun ai.

Dai ginra masha ni gaw nam hkan na tsi pawt tsi ru ni hpe hkan tam la nna dut ai bungli hpe madung shang gumhpraw hku galaw nga ai re, Covid ana zinli nau n sawng ai ten gaw Miwa mung jarit hku dut shalai mai ai raitim ana zinli a majaw hkrun lam ni pat mat nna tsi pawt tsi ru  mari ai hpaga masha ni mung n nga ai sha n-ga Putao de dut shalai na matu manu n lu ai lam ni byin nga ai. Nok Mung ginra de covid kap bra ai masha n nga ai madang rai wa sai raitim Putao girna de gaw ana kap bra masha shani shagu naw mu jep nga ai lam ginra masha ni shana wa ai kaw na chye lu ai.

 

 

Leave a Reply

Your email address will not be published.