KIA Masat (6) Dap Ba, Masat (36) Dap Dung Ginra Shiga

Munggu ginwang, Sama mare hte Hkabang mare lapran kaw Myen hpyen gumshem dap hte Wunpawng Mungdan Shanglawt Hpyen Dap KIA ni January (13) ya shana de hkying (1:15) Pm hta gasat poi byin ai lam nga ai.

Myen hpyen gumshem dap Tatma (77) ngu maram lu ai n-gun (100) daram lawm ai hpung ni KIA hpyen dap nga ai ginra mayan de shang wa ai majaw KIA hpyen hpung ni hkap shing la gasat ai kawn gasat poi byin wa ai re lam shawng lam lit nga salang langai tsun ai.

Gasat gala zim mat ai hpang Myen hpyen gumshem dap ni  Sama mare makau grup yin hkan naw matut shamu shamawt gayin hkawm nga ai majaw gasat poi ni naw matut byin wa mai ai lam mung dai salang wa tsun maram da ai re.

January (12) ya shani hta mung Nawng Heng, Loi Sa mare makau hkan Myen hpyen gumshem dap hte MNDAA ni gasat poi laja lana byin ai majaw dai ginra na Mung mare masha nkau ni Mungbaw Pa de hprawng yen mat ra ai lam na chye lu ai.

Leave a Reply

Your email address will not be published.