Lai wa sai 2015 ning hta Lahta Sam Mung, Kawng Hka mare kaw mazut roi rip zingri sat kau hkrum ai KBC Laika Sasana ap nawng Saranum yan a amu manghkang hte seng nna Tengman ai mahtai lu hkra hkrang shapraw galaw nga dingyang re lam, KBC Ningbaw tsun ai.
Ndai amu manghkang hte seng nna Tara Kasa ni shanglawm ai Tengman ai mahtai tam hpung kaw nna galaw nga dingyang rai nga ai hta mungmasa lam hta hkan nna maram masam let galaw nga dingyang re, hti mat ai, si mat ai lam n re, tengman ai mahtai n lu dingsa gaw matut galaw sa wa na re. Hkristan ni re majaw mara nlu raw ya ai i? nga nna tsun ai ni mung nga ai anhte mara n lu raw ya nna n re, mara raw ya lu ai raitim tengman ai mahtai hpe anhte lu mayu ai re, Htawm hpang e mung Tengman ai hku tsap ai bungli gaw galoi mung n sum ai ngu ai mahtai nga ai ngu ai hpe chye shangun mayu ai majaw ndai lam hte seng nna matut manoi galaw nga ai lam (7) ning ladu hkrum akyu hpyi hpawng kaw tsun ai.
Ndai amu manghkang hte seng nna Tengman ai mahtai tam hpung kaw nna Myen hpyendap hte hkrum jahta ai lam ni galaw lai wa sai raitim Myen hpyendap maga na gaw dai amu manghkang hta shanglawm ai Myen hpyen hpung ni hpe makoi magap da ai lam, Saranum yan hpe mazut roi rip ai shana Kawng Hka mare kaw du ai Hk.M.Y (503) kaw na Hpyenhpung (စစ်ကြောင်းမှူး)ni hte dingtawk hkrum shaga na ahkang pat kau ai lam ni galaw ai lam nga ai.
Mazut roi rip sat kau hkrum ai Saranum Tangbau Hkawn Nan Tsin hte Saranum Maran Lu Ra yan gaw Jinghpaw Wunpawng Hkalup Hpung Ginjaw KBC kaw nna masing jahkrat woi awn galaw nga ai Laika Sasana magam bungli hta Kawng Hka mare kaw ap nawng ai ten, 2015 ning January (19)ya shana mazut roi rip zingri sat kau da hkrum ai re hpe mung chye lu ai.