Laiza Jau ginwang hte Sara Daw ginwang Hpaji magam dap ni ta gindun woi awn galaw ai 2021-22 hpaji ladaw tsang shi awng ramma ni a ningja jat sharin hpawng hpe Ja htu Kawng RCM Nawku Jawng kaw June 24 ya kaw nna galaw nga ai lam chye lu ai.
Sharin hpawng hta Nawku makam masham hte ramma prat hpe gaw gap lu na lam, ramma langai a shawng lam hpaji masa, Tinang hkum tinang myit makam nga nga hte shawng lam hkawm sa lu na matu,shinggyim nga sat nga sa hta ningmu kaja hte gara hku kyit hkai galaw sa wa ra ai lam ni, Ninggawn mung masa hte Wunpawng mungdan shang lawt Asuya a Hpaji masing masa lam ni, Youth and politic ngu ai ga baw kata Dkb Sumlut Gun Maw kawn hpaji jaw da ai re.
Lai wa sai ten gaw covid -19 ana zinli a majaw ya na zawn sharin hpawng ni n lu galaw ya ai, ndai lang shawngning nan lang hku nna Tsang shi awng sai ramma ni hpe shawng lam hta gara hku shakut shaja ra ai, tinang hkum myit makam nga hkra hte lam shagu hta lit la chye ai ramma ni byin tai na matu yaw shada let woi galaw ai re lam Laiza jau ginwang Up Wa Jau Peter Lazum Tu Lum tsun ai.
Sharin hpawng hpe June 24 kaw nna 26 ya shani du hkra sharin na re. Sharin hpawng hta ramma marai (100) hkawt sa du sharin hkam la ai re hpe chye lu ai.