Myen Hpyen Gumshem Dap Laknak Gap Shadam Ai Majaw Mungshawa Modo Hten Hkrum

Hpakant lam, Nam Ya mare kaw dap jung da ai Myen hpyen gumshem dap HK.M.Y (12) hpyen dap ni kawn July (3) ya shani hkying (11:58) aten makau grup yin de laknak gap shadam ai lam nga ai.

Gasat poi byin ai lam n nga ai raitim Myen hpyen gumshem dap ni kawn makau grup yin de (80) MM ngu maram lu ai laknak kaba gap shadam ai hta Seng Hpra mare, Sabaw Maw sa lam makau na U Aung Zaw Oo ngu ai wa a dum nta wang kaw wa hkrat kapaw nna 4-Whell Modo langai hten hkrum mat ai lam nga ai hpe chye lu ai.

Myen hpyen gumshem dap ni gap dat ai laknak kaba si mungmare masha nga ai mare kata wa hkrat kapaw ai hta mungmasha hkra hkala hkrum ai lam n nga ai raitim Lai wa sai ten hkan mung Nam Ya hpyen dap kawn laknak kaba gap shadam ai hta mungshawa dum nta hten hkrum ai lam masha hkra hkala hkrum ai lam ni byin ai majaw hkrit tsang nga ma ai lam ginra masha ni tsun ai.

Nam Ya Myen hpyen gumshem dap hte P.T.Ts hpung ni gaw lai wa sai ten hkan mung gasat poi byin ai lam nnga tim makau grup yin de shani shana aten ntam laknak kaba gap shadam ai lam jahkring hkring galaw nga ai sha n-ga shanhte a shagyit kaw Hpakant de lung wa yu wa ni hpe mung azin ayang sawk jep ai lam ni galaw nga ai lam sagawn chye lu ai.

Leave a Reply

Your email address will not be published.