69 lang na Jinghpaw Mungdaw masat ninghtoi lamang galaw

69 lang na Jinghpaw Mungdaw masat ninghtoi shagrau ai akyu hpyi hpawng lamang hpe  Amyu sha zinlum hpung ni woi awn ai hte   Myitkyina Shata Pru Manau wang kaw January (10) ya jahpawt hkying (9:00)Am kaw na galaw hpang ai lam Amyu Sha Pyen U shana wa ai.

Hpawng hta Jinghpaw Mungdaw Masat ninghtoi byin wa ai labau kadun tsun sanglang dan ai lam, Htunghking ka hkrang, Majan byin nga ai kumla gamung naura madun nhtawm KBC Amu madu Rev. Dr. Hkalam Sam Sun kaw nna mung “Mungdaw Ninghtoi Kaw Nna Kachin Lawt Lam De” ngu ai gabaw hpe mahta nna “Wunpawng amyu bawsang ni “Ga” nbung ai gaw amyu nbung ai nre, Labau maumwi ginru ginsa yawng maren sha re, dai majaw wunpawng amyu sha yawng kam hkat nna myit hkrum kahkyin gumdin na sha ahkyak dik re” nga nna tsun shadum mungga jaw ai lam chye lu ai. Wunpawng bawsang shagu na amyu sha ni, makam masham hpung woi ni, Kachin mung masa Party ni, Kachin CSO ni hte sa du shang lawm ai Mung shawa ni yawng marai (15000) jan re hpe mung chye lu ai.

Wunpawng Amyu sha ni yawng myit hkrum mangrum kahkyin gumdin nga ai ngu ai kumla hpe shapraw let manau wang kata grup hkra amyu sha dawnghkawn hpe sharawt nhtawm Myitkyina muklum kata na wunpawng amyu sha dum nta shagu mung amyu sha dawnghkawn sharawt ai lam galaw ai. Ndai zawn  masat ninghtoi  akyu hpyi hpawng  lamang hpe Hpakant, Kachin Sub-state ginra  kata hte Maigan Mungdan shara law law hta mung galaw ai hpe na chye lu ai.

Jinghpaw Mungdaw masat ninghtoi lamang hpe Mungdan simsa lam sat lawat kaja wa ai hpang lai wa sai 2005 ning kaw na Myikyina Shata Pru manau wang hta masat ninghtoi hpe shagrau sha a ai hku Manau poi kaba hpe galaw lai wa sai re, 2011 ning Myen Hpyen Dap ni kaw na  KIA Hpyen Dap hpe shagrawt majan hku gasat wa ai kaw nna dai zawn Jinghpaw Mungdaw masat ninghtoi lamang hpe wu wu didi galaw ai lam nnga ai re hpe mung chye lu ai.

Leave a Reply

Your email address will not be published. Required fields are marked *