Ngaw Chang Hka mayan kaw nga ai Mung mare masha ni hka wan jak masing hpe ninghkap nga

Saw Law hte Chihpwi ginwang lapran nga ai Ngaw Chang Hka kaw Miwa Yunan masha ni galaw nga ai hka wan jak masing (4) hpe mare masha ni nra sharawng ai majaw ninghkap ai lam amyu myu galaw wa sai re hpe na chye lu ai.

Mare masha ni gaw ndai Ngaw Chang hka hte sha yi sun, hkau na ni galaw sha nga ai re, anhte a lamu ga hta moi ji woi ji wa ni kaw nna shaning (1000) hku galaw sha lai wa sai re, anhte kaga gara de htawt sit galaw sha nga ra na hpe mung nchye ai nga nna Chihpwi hte Saw Law ginwang kaw nga ai mung mare masha ni a bawngring lam hte seng nna woi awn nga ai Salang Zawng Dai tsun shana wa ai.

Lai wa sai aten ni hta shawng na Myen Mung Gum San Magam Thein Sein hte ya na Gum san magam U Htin Kyaw hpe hka wan jak masing hpe jahkring ya na matu laika bang sai, ya mung matut nna tang shawn ai na, Mungdan Asuya hte mung hkrum shaga na lam hte ninghkap lam amyu myu galaw sa wa na re nga nna Salang Zawng Dai matut tsun ai.

Ndai hka wan jak masing hpe Miwa Yunan masha ni kawn 2009 ning kaw galaw hpang wa ai rai nna 2012 ning hta majan a majaw gan jahkring da ai re hte Ngaw Chang Hka mayan hta mare (63) daram nga ai hpe chye lu ai.

Myitkyina, Hotel Medira kaw July (3) ya shani hkying (1:00)Pm hta Ngaw Chang Hka kaw galaw na wan jak masing hte seng nna shi sanglang hpawng galaw na hpe mung chye lu ai.

Leave a Reply

Your email address will not be published.