Kasung Mare Na Hpyen Yen Mung Masha Ni Yawng Ngu Na Daram Lambraw Yang Mare Kaw Du Nga Sai

Kasung gaw sharawt mare kaw August (11) ya shani Myen hpyen ni a kajawng htim gasat shang wa ai majaw mare masha ni dumbri dumbra hprawng yen ra mat ai re, ya aten hpyen yen Mung shawa yawng ngu na daram gaw Lambraw yang mare kaw du nga sai lam na chye lu ai.

Hprawng yen wa ai mare masha ni hpe Namati, Mugawng, Lambraw Yang nawku hpung, garum kahtau hpung, Pat Jasan hpung ni kawn mawdaw ni hte sa tau lahka la nna Lambraw Yang Hkalup Hpung nawku jawng hte RC Nawku jawng kaw gan shanu shabyi nga shangun ai re, ya aten hpyen yen masha marai (900) daram du nga sai hte ndu wa shi ai marai (10) daram naw nga ai lam Lambraw Yang mare garum kahtau hpung hta shang lawm nga ai salang langai tsun ai.

Myen Hpyen Hpung ni gaw Kasung mare de laknak kaba gap bang nna htim gasat shang wa ai hpang Kasung Lapran tsang jawng na srn Ah tsai, Slg. Lamuk Awng Nu hte salangLagang La Nan ni hpe mara kata gap sat kau da ai re, salang Tu Hkawng gaw hkala hkrum nna ya aten Lam Braw yang kaw du nga sai lam hprawng yen wa ai Kasung mare na salang langai tsun ai.

Asak si sum mat ai marai masum a moi mang hpe sa hta la na matu Lam Braw Yang garum kahtau hpung ni PCG hte Naypidaw rapdaw de hpyi shawn da ai lam nga ai hpe chye lu ai.

Ya aten Kasung hpyen yen mung masha ni gaw shara matsut matsat rai nna bilat ntsa kaw sha mu-ga nyep let yup ra ai re, August (12) ya shani hta garum ningtum hpung hte NGO uhpung ni mung garum ningtum arung arai ni hte hpawn sa du nna hpyen yen Mung masha ni hpe gara hku jawm lakawn lanawn sa wa na lam bawngban jahkrup nga ma ai hpe Lambraw Yang mare na salang langai tsun ai.

Kasung mare gaw buga gaw sharawt mare rai nhtawm KIA hpyen dap mung nnga ai sha n-ga KIA hpyenla ni mung hkap nga ai lam nnga ai raitim August (11) ya jahpawt daw hta Col. Aung Than Thwe woi awn ai Myen Hpyendap Ts.K.Hk (3) kata na Hk.M.Y (381), (384) pawnghpawm hpyen hpung ni mare kata laknak kaba gap bang nna htim gasat shang wa ai majaw Mung masha ni dumbri dumbra hprawngyen ra mat ai re hpe shi sawk Ing Raw tang madun da ai.

 

Leave a Reply

Your email address will not be published. Required fields are marked *