Mai Ja Yang Kaw COVID-19 Ana Kap Hkrum Masha Marai (100) Jan Tinang Dum Nta Wa Sai

Mai Ja Yang muklum kata COVID-19 Ana jep mu ai majaw tsi gawn lajang hkam la nga ai ni hta na marai (128) gaw atsawm sha mai tsai sai majaw, August (5)ya shani gawn lajang dabang kaw na pru ahkang jaw sai lam, Sinpraw Ginwang Ginjaw COVID-19 Ana Zinli Makawp Ninghkap Komiti kaw na chye lu ai.

Mai tsai nna nta wa ahkang lu ai ni gaw Positive Dabang kaw nna Negative dabang kaw nhtoi (14)ya hkamja lam masam maram hkam nhtawm, tsi bai jep yang ana jep mu ai lam n nga, mai tsai ai ni hpe pru ahkang jaw ai re hpe chye lu ai.

Positive Tsi gawn lajang dabang kaw tsi gawn lajang hkamla nga ai masha marai (238) mung Negative gale ai lam nga sai majaw, Negative dabang de shara htawt sit nhtawm hkamja lam masam maram naw hkam la nga ma ai re.

COVID ana byin hkrum nna mai tsai ai ni hpe tinang mare lawk a COVID tara hte maren hkan nang hkan sa na matu hte nhtoi (10) ya daram shinggan de n pru prang hkawm ai, tinang a nta kaw nga na matu mung laksan htet dat ai lam nga ai  hpe na chye lu ai.

Mai Ja Yang muklum kata ana jep mu lu ai nta ni hpe nta lockdown galaw da ai kaw na dawm ya ai raitim, lawk lockdown hte muklum lockdown tara gaw naw matut hkan sa ra ai.

KIO uphkang ginra kata COVID-19 Positive jep mu nna ya aten tsi gawn lajang hkamla nga ai ni, Laiza kaw marai (52), Mai Ja yang kaw marai (762), Sadung ginwang kaw marai (21) nga ai re lam Ginjaw COVID-19 Ana Zinli Makawp Ninghkap Komiti a 4-8-2021 ya ndau laika hta mu chye lu ai.

 

Leave a Reply

Your email address will not be published. Required fields are marked *