Laiza Kaw COVID-19 Ana Kap Ai Masha Marai (5) Bai Jep Mu Jat

Numdaw lahkawng lang ngu na Laiza kata kaw COVID jep ai shaloi Woichyai Shanan Boarder kaw Auguat (6) ya shani jawngma marai (5) Postive bai jep mu jat ai lam Ginjaw COVID-19 Ana Zinli Makawp Ninghkap Komiti kaw na chye lu ai.

Ana jep mu ai dai jawngma ni hpe Munglai Hkyet Tsi rung kaw tsi gawn lajang na matu sa da sai rai nna, Boarder kaw naw ngam nga ai ni hpe  Laiza Lahta Tsang Jawng Gawn Lajang Dabang kaw garan nna hkamja lam masam maram nga ai lam galaw ai re.

Laiza muklum kata lawk hte lawk hpe lockdown galaw da nhtawm,  numdaw masum lang du hkra ana jep chyoi ai lam hpe galaw na matu hkyen shajin da ai. Ana jep mu jat ai lam n nga yang Lockdown galaw da ai hpe gau ngwi ngwi dawm na re lam, Ginjaw COVID-19 Ana Zinli Makawp Ninghkap Komiti Ningtau Ningbaw Dkb Zau Raw  tsun ai.

COVID-19 ana zinli makawp ninghkap lu na matu  yawng  hta lit nga ai re majaw, ana hpe bunghkup kau lu hkra ana rawng ai n rawng ai hpe mung jep shapraw shakut nga ai ten re. COVID tara hpe mung myitmang hkrum ai hte hkan sa nga ga nga nna mung COVID-19 Ana Zinli Makawp Ninghkap Komiti tsun shadum da ai.

Ana jep ai shara ni de Ginjaw COVID-19 Ana Zinli Makawp Ninghkap Komiti Ningbaw Sara Kaba Sumlut Gam hkum nan hte kaga Komiti Salang ni shara garan aten garan nhtawm shani shagu  sa du gawan ai lam ni mung galaw nga ai re.

Je Yang Hpyenyen Dabang hte Hpunglum Yang hpyenyen dabang hta kaw gaw ana jep chyoi ai lam galaw ai raitim ana jep mu ai masha n nga ai. Matut manoi dabat jep  ai lam naw galaw na  re hpe chye lu ai.

 

Leave a Reply

Your email address will not be published. Required fields are marked *