Mai Sak Pa Quarantine Dabang Kata September shata (27) ya shani duhkra Quarantine hkamla nga ai masha marai (225) nga ai hta num marai (104) hte la marai (121) nga ai re lam Mai Sak Pa Quarantine Dabang Up Salang Kaba Brang Seng tsun ai kaw na chye lu ai.
Ya aten Quarantine hkamla nga ai ni gaw Laiza Muklum kata na mungmasha ni hte Jarit Mayan Hpyenyen mung masha ni kanbau bungli a matu tam lu tam sha hkawm nhtawm tinang buga de bai nhtang wa ai ni re lam chye lu ai.
Laiza Muklum kata de COVID-19 ana n shang hkra Ginjaw COVID-19 ana zinli ninghkap komiti ni hku nna check point hte Quarantine ni shagreng nhtawm masha pru shang lam ni ja ja jen jep nga ai sha n-ga hkawmsa hkawmwa modo , cycle, gunrai hte laiwa laisa masha ni hpe tsi jep , tsi gat ai lam ni hpe mung dingyang galaw nga ai re lam chye lu ai.
Muklum kata na mung shawa ni hte Hpyenyen mung shawa ni a matu N-gu , Jum , Sau , Shakau ni hpe ana kanu sat tsi gat kau nhtawm htaw shalai la lu na matu Ginjaw COVID-19 ana zinli ninghkap komiti ni hku nna Gunrai htinglet dabang dingsa hpe ya aten nnan bai gaw gap nga ai re lam chye lu ai.
Laiza muklum kata hta COVID-19 ana chyam bra ai lam nnga hkra lit nga ai ni hku nna shani shagu gawan gayin hkawm let ni masha hpawng chyawm ai lam n galaw na matu hte Mask shakap na matu dingyang yu gawn hkang nga ai re.