Sinpraw Ginwang Ginjaw kata na Manmaw Ginwang, Ulang Pa Ginwang, Shwegu Ginwang kata na mungshawa ni lai wa sai September shata kaw nna hpang nhtawm shawng nnan lang na COVID-19 ana makawp ninghkap tsi htu ai lam hpe galaw la lu sai lam lit nga Salang ni kaw na chye lu ai.
Asak (15) ning hte asak (60) ning lapran na hkamja ai ni hpe shawng nnan htu ya ai re. marai (3000) hpe Tsi htu ya ngut sai.Numdaw lahkawng lang tsi bai htu na gaw October (18)ya shani kaw bai hpang na re lam Manmaw, Ulang Pa, Shwegu Ginwang pawnghpawm COVID-19 ana zinli makawp ninghkap komiti Salang ni kaw na chye lu ai.
Ndai Ginwang ni hta COVID ana jep ai lam hpe mung galaw nga ai. October (10)ya shani du hkra ana jep mu lu ai masha marai (177) nga ai hta, mai tsai nna nta wa ai masha marai (11), Tsi gawn lajang naw hkam la dingyang re ai marai (145), Negative dabang kaw hkamja lam maram masam hkam la nga ai marai (21) nga ai. Ginwang kata September (29) ya shani kaw nna hkawm sa hkawm wa ahkang hte hpawng chyawm hpawng de lam ni hpe mung pat hkum da ai rai nna COVID ana zinli kap bra masa hta hkan nhtawm tara bai galai shai ai lam nga wa na re mung chye lu ai.