Hpakant Lam,Namsheng Bum kaw nga ai Myen hpyen gumshem dap Hk.M.Y (12) dap ni mungshawa ni hpe manu jahpu gumhpraw njaw ai sha October (15) ya jahpawt hpyen dap grup grup nam hkyen jasan shangun ai lam na chye lu ai.
Ndai nam hkyen jasan shangun ai shara kaw lai wa sai October (13) ya shana de hkying (5:40) aten daram hta bawm kapaw manghkang byin lai wa ai shara re majaw mungshawa ni hpe dasang hkyen shangun ai re lam na chye lu ai.
HK.M.Y (12)dap na Major Naing Zaw Aung Kawn Labang Kahtawng ,Namsheng, Hka San mare uphkang salang ni hpe shaga la nna htinggaw mi marai langai hpra nsa nmai ngu nam hkyen jasan ai re lam mare masha langai tsun ai.
“shanhte hpyen dap kawn na ningbaw major naing shi matsun da tai tai rai nga, mare salang ni hpe matsun na mare salang ni hku na bai nta htinggaw langai hta marai langai hpra hku san seng lam wa galaw ai masa hku rai nga”
Myen hpyen gumshem dap ni shara jahkrat nga ai Namsheng Bum pawt kaw na Hpahka sun mayan kaw hkyen jasan shangun ai re lam na chye lu ai.