Waimaw, Wuyan P.T.Ts hpyen dap Kaw Wunpawng Mungdan Shanglawt Hpyen Dap KIA ni January (8) ya jahpawt hkying 6:10 aten daram hta wa gap gasat ai lam nga ai.
Gasat gala byin ai majaw P.T.Ts hpung ni lai wa lai sa ni hpe pat hkum da nna makau grup yin de laknak kaji kaba hkrup mara gap bang ai lam mung na chye lu ai.
Dai P.T.Ts hpung ni mare masha ni hte jahkrup bawngban ai lam n nga ai sha shagyit wa jahkrat nhtawm lai wa lai sa mungmasha hte modo sengke yawng hpe sawk jep nna gumhpraw hta sha ai lam ni galaw nga ai hpe chye lu ai.
Wunpawng Mungdan Shanglawt Hpyen Dap KIA masat 6 Dap Ba Masat 36 Dap Dung ginra Munggu ginwang Shwi Zin Wan bum kaw mung dai jahpawt hkying (6:30) aten daram hta Myen hpyen gumshem dap hte KIA hpyen hpung ni gasat gala byin ai lam nga ai.