KIA Masat (3) Dap Ba, Masat (1) Dap Dung Ginra Kaw Gasat Gala Byin

Wunpawng Mungdan Shanglawt Hpyen Dap, Manmaw ginwang, Man Je Hpan Hka Kawng kaw February (7) ya shani Myen hpyen gumshem Balik ni hte KIA, PDF pawnghpawm hpung ni gasat poi byin ai lam nga ai.

Hpan Hka Kawng kaw dung ai Myen hpyen gumshem dap hte Balik ni a pawnghpawm shagyit  hpe KIA hte PDF pawnghpawm hpung ni sa htim gasat ai kawn lahkawng maga Minutes (30) daram gasat poi byin wa ai re lam na chye lu ai.

Gasat poi byin ai ten Myen hpyen gumshem dap Hk.L.Y (47) dap ni kawn gasat poi byin ai shara de (60) MM ngu maram lu ai laknak kaba gap bang ai hta Hpan Hka Kawng mare na Slg.Lahtaw Zau Yaw asak (53) ning sinda kaw pala hkyep hkra hkala hkrum mat ai lam mung nga ai re hpe matut chye lu ai.

Lai wa sai February (6) ya shani hta mung KIA masat (12) dap dung ginra, Shwi Gu hpyen gumshem Balik dap hpe sa htim gap gasat ai lam nga ai hta Myen hpyen gumshem dap HK.L.Y (56), HK.M.Y (602) dap hte Balik dap ni kawn laknak kaba bai nhtang gap ai hpang gasat poi laja lana byin ai lam nga ai sai re.

Dai shani hta sha KIA masat (27) dap dung ginra, Na Hkawng Bum lawu Hkrai Nga Kawng mayan kaw Bang Gaw mare hte Jan Mai Kawng Ra mare kawn pru wa ai Myen hpyen gumshem dap Hk.M.Y (424) hte Hk.L.Y (223) n-gun (100) pawnghpawm hpung ni hpe KIA hpyen hpung ni hkap shing la gap gasat nna gasat poi byin ai lam nga sai re hpe na chye lu ai.

Leave a Reply

Your email address will not be published.