Putao, Machang Baw ginra Nam Hti Hka mayan ya aten na mung masa shuk shanut nga ai hpe ahkaw ahkang la nna jak kaba ni hte ja htu sha ai lam grau grau sawng wa ai majaw hka n tsawm ai lam nga ai hpe ginra masha ni tsun ai kaw na chye lu ai.
Lai wa sai aten ginra masha ni kawn ding di dang dep ai daram sha ja htu nna ja gumhpraw tam la ai raitim 2021 ning hpang daw kaw nna Nam Hti hka mayan jak kaba ni hte ja htu ai lam law wa ai majaw aten hpring hka ntsawm hkanu ai hte shingra tara grau grau htenza wa na hpe ginra masha ni myit tsang nga ai hte ja htu sha ai lam hpe jahkring kau na ra sharawng nga ma ai re.
“Company ni hte Lam galaw ai ngu gabaw hte ginra masha ni hpe tsun ai raitim maga mi de gaw ja htu sha nga ai re. shara n kau ni hta gaw majan a majaw hpyen koiyen nga ai mare masha ni a lamu ga ni de du hkra ja htu sha kau ya ai lam ni mung nga ai rai nna, Putao ginra masha ni law malawng gaw yi sun hpe madung galaw ai majaw n kau shara ni gaw Company lauban ni a jahtu shara ni hta lawm mat ai lam ni a majaw yi sun ni mung n lu galaw rai yak hkak ai lam law wa ai majaw ja htu sha ai lam hpe jahkring shangun mayu ai” nga nna ginra masha langai tsun ai re.
Jinghpaw mung kata Myen hpyen gumshem dap mungdan daru magam ahkang aya zing madu la kau ai hpang kaw nna Jinghpaw mung kata shara shagu tara n shang ja htu sha ai lam grau grau law wa ai majaw Mungmasha ni gaw hka shi, hkanu lamu ga, shingra tara hten za ma wa na hpe myit tsang ai lam law nga ai re hpe chye lu ai.