Mungmyit Sinli ga, Muse ginra Pang Hkam mare jak sau seng makau KTV kaw July (24) ya jahpawt maga hkying (3:00) jan aten daram hta P.T.Ts hte Pan Se P.T.Ts ni shada gap gasat hkat ai lam ginra masha ni kaw na chye lu ai.
Muse Myen hpyen gumshem dap n pu na P.T.Ts hpyen hpung ni nga ai dap shara (2) lapran kaw bawm kapaw manghkang byin wa nna shada gap gasat hkat wa ai re hte dai gap gasat hkat ai shara makau kaw Pan Se P.T.Ts ni a hpai da wang mung nga ai lam chye lu ai.
Muse ginra kata kaw ya aten Myen hpyen gumshem hpyen n-gun hta P.T.Ts hpyen n-gun grau law nga ai sha n-ga P.T.Ts hpyen hpung ni gaw sinat laknak ni hpe hkrup mara jai lang nna lagu lagut, damya manghkang ni hte mung gindun achya nga ai lam nga ai re.
July (21) ya shana, Shd. Labya Mun Ta Doi hpe gap sat ai damya hpung kaw mung Lung Htang P.T.Ts hpyen hpung na masha lawm wa ai majaw Myen Hpyen gumshem dap ni kaw nna P.T.Ts hpyen hpung ni hpe bungli aten hta lai nna laknak n lang hkawm na matu July (23) shani matsun aming jahkrat da ai lam Muse ginra masha langai ya na zawn tsun ai.
Ndai amu manghkang hpe ahpa atang hku n myit ai sha seng ang ai Wuhpung wuhpawng ni kaw nna lit la nna amu hparan sa wa na matu hkyen lajang nga ma ai re hte Si sum mat ai Labya Mun Ta Doi a moi mang hpe July (24) ya shani shi a buga Kutkai dum n-ta kaw akyu hpyi nna makoi mayang sai lam matut chye lu ai.
