Kamaing kaw dap jung shara jahkrat nga ai Myen hpyen gumshem dap ni kawn makau grup yin de laknak hkrup mara gap shadam ai majaw Mung mare masha ni grai hkrit tsang nga ai lam ginra masha ni tsun shana wa ai.
October (25) ya shana hkying (8:00) aten daram kaw nna Myen hpyen gumshem dap ni Kamaing Byuha kawng kaw nna makau grup yin de 120 MM ngu maram lu ai laknak kaba hte jak sinat ni gap shadam ai lam nga ai hte October (26) ya shana maga hkying (2:00) aten daram hta mung makau grup yin de laknak hkrup mara bai gap ai lam nga ai re.
Ya aten Kamaing myo kata na Hpaji Jawng hkan mung Myen hpyen ni shim lam la ya na ngu sa tsun wa ai lam ni nga ai majaw ginra Mungmasha ni, Jawngma Kanu Kawa ni krit tsang nna Kasha ni hpe Jawng mung n gwi sa shamngun rai yak hkak nga ai hpe sagawn chye lu ai.
Kamaing Byuha kawng kaw dap jung shara jahkrat nga ai Myen hpyen gumshem dap ni gaw mare makau grup yin ni de gasat poi byin ai lam nnga ai raitim ya na zawn hkrup mara kaji kaba gap shadam ai lam jahkring hkring galaw nga ai majaw ginra Mung mare masha ni hkrit tsang let sha nga ra ai re hpe na chye lu ai.