Kuthkai Byuha kawng na Myen hpyen gumshem dap ni kawn November (3) ya shana hkying (8:40) Pm aten Kuthkai Chyum Jawng (KTC) wang de laknak gap bang ai majaw jawngma nkau hkra hkala hkrum ai lam nga ai hpe sagawn chye lu ai.
Myen hpyen gumshem dap ni kawn a kajawng sha (81) MM ngu maram lu ai laknak kaba gap dat ai hta jawng ma nga nta makau kaw nan wa hkrat kapaw ai majaw jawngma la kasha marai 4 a Du, Shingma hte Lagaw ni hkan laknak hkyep hkra hkala la ai re hpe chye lu ai.
Myen hpyen gumshem dap ni kawn makau grup yin hkan gasat poi byin ai lam nnga ai raitim jawng wang de laknak gap bang ai gaw mungmasha hpe hpyen ngu masat nna yaw shada lam nga nga hte galaw ai lam re majaw ninghkap nra sharawng ai lam ginra masha langai tsun ai.
“Makau grup yin kaw mung hpa mabyin byin ai lam nnga ai raitim Jawng Wang de nan laknak gap bang ai ngu gaw da sang nan re, Anhte Wunpawng myu sha ni hpe ma hpyen magam gun nnga, mungshawa nnga, nawku hpung magam gun nnga yawng hpe hpyen ngu masat da ai hte bung ai, n tara lam re, dai majaw Mungkan kaw na mung ahkyak la ra ai, ahkyak la lam n sen hpe shapraw ra ai” nga nna Kuthkai ginra masha langai mu mada lam hpe tsun ai.
Kuthkai Chyum Jawng (KTC) hta ya aten wunpawng buga ginra shara shagu na ramma ni, nawku hpung magam gun ni marai (200) grup yin chyum hpaji sharin hkam la nga re hpe chye lu ai.