Kuthkai ginwang, Namhpalun bum hte Hkahkyip mare lapran kaw December (14) ya shana de hkying (4:00) aten Myen hpyen gumshem dap Modo hpung ni hpe KIA pawnghpawm hpyen hpung ni bawm hte hkap gasat ai lam nga ai.
Myen hpyen gumshem dap hpung ni gaw Nam Hkai hka mahkrai hpyen dap kawn hpyen n-gun hpyen lang rung rai, lu sha ni htaw nna Modo hte shamu shamawt rawt pru wa ai kaw KIA hte PDF pawnghpawm hpyen hpung ni bawm hte hkap gasat ai hta Myen hpyen gumshem dap maga na hkra hkala hkrum ai lam nga ai hpe mung na chye lu ai.
Mungmyit Sinli Ga ginra hta Myen hpyen gumshem dap ni hpyen n-gun jat nna htu shadut nga ai majaw KIA, MNDAA ni hte gasat poi matut manoi byin nga ai re, lai wa sai December praw kaw nna Nam San, Human ginra mayan hkan hpyen n-gun tsa kaba hte hpyen man law law hpaw nna lagaw lam hku htu shadut htim gasat ai sha n-ga Nbungli ni hte mung laja lana htim gasat wa ai majaw dai ginra hta Myen hpyen gumshem dap hte TNLA hpyen hpung ni shani shagu gasat poi byin nga ai re, gasat poi byin ai hta laknak kaba si ni mare de wa hkrat ai majaw mung mungshawa dum nta ni hten hkrum mat ai zawn, mungmasha law law mung hprawng koi yen hkawm ra nga ai lam sagawn chye lu ai.