KIA Masat (2) Dap Ba Daju, Sinna Ginwang Ginjaw ginra Lawt Awng Mungshawa Tsi Rung hta Tsi gawn lajang madang shatsaw la ai sha n-ga Ga Gadoi gawk ningnan hpe mung hpaw shabawn la lu sai lam chye lu ai.
N-dai Ga gadoi gawk hpe 2023 ning April (7) ya shani tsi gawk hpaw hpawng lamang mung galaw ai lam nga sai rai nna mungshawa ni Myo mare kaba de ja gumhpraw grai ma nna hkrun lam mayak ni grai nga ai majaw tsi gawn lajang ai hta grau na masan sa let tsi gawn lajang la lu na matu yaw shada let n-dai Ga gadoi gawk hpe hpaw shabawn ai re lam N-dai mungshawa tsi rung hta Mungshawa machyi masha ni hku nna manu jahpu nma ai sha tsi gawn lajang hkam la mai ai rai nna tsi gawn lajang ai hta bai mari lang ra ai rung rai hte lu la yak ai tsi mawan manu ni hpe gaw hkyam sa ai hku hta la ai lam Lawt Awng Mungshawa Tsi Rung Up Sara Wun Lafa Dau Hkawng tsun ai.
Lawt Awng Mungshawa Tsi rung hta ya aten Lawt Awng mare masha ni sha n-ga Awng Lawt Mare, Nawng Nyeng mare, Zup Mai mare, Maji bum mare, Ga Shara mare, hte Ja maw de ja gumhpraw tam na du nga ai ni, Lido lam mayan de na mungshawa machyi masha ni sa du tsi gawn lajang nga ai mungshawa tsi rung langai re hpe sagawn chye lu ai.
Lawt Awng Mugshawa Tsi Rung hpe lai wa sai 2020 ning July shata kawn hpaw hpang wa ai rai nna Tsi rung magam gun marai (15) nga ai re hpe sagawn chye lu ai.