Thai Mung Jarit Tachilik kaw nga ai Mai Hpung Sr. Daw gaw April shata (13) ya shani hta Putao ginra sa du nna Bukda makam masham hpan langai mung n nga ai Zi Ya Dam mare kaw Gawkngu Hpara shachyaw na lam hte seng nna du nga ai hpe Rudi mung mare masha ni ninghkap nga ai lam chye lu ai.
Myen Buddha makam masham hpung langai mi pyi n nga ai Zi Ya Dam mare kaw makam masham hpe galaw nna Gawkngu Hpara shachyaw na masing jahkrat wa ai lam gaw makam masham hpung ni hpe shada da byin shangun ai sha n-ga ndai zawn galaw na lam hpe Rudi mung mare masha kadai mung nra sharawng myit n hkrum ai nga nna Putao ginra masha langai tsun ai.
Mai Hpung Sara Daw gaw April shata (11) ya shani kaw nna Jinghpaw Mung de du shang wa nna Apri (13) kaw na (15) masum ya tup Putao ginra kaw nga na hte April (16) kaw nna (18) masum ya tup gaw Zi Ya Dam mare de sasana shang ai ngu ai gabaw hte Gawk Ngu Hpara galaw na matu shara yu na hte Putao girna kaw gaw kade ya nga na tup hkrak nchye lu shi ai rai nna Myitkina , Waimaw , Loi je , Nam Hkam , Muse ginra ni de mung sa du na re lam na chye lu ai.
Mai Hpung Sara Daw gaw Jinghpaw mung de hkrunlam hkawm na matu Myen Mung ting na ခရိုနီ kaba rai nga ai U Te Za nan garum madi shadaw ya ai lam nga ai re, shi a hkrunlam gaw sasana hkrunlam nga nna hkawm ai hta buddha makam masham hpung nga ai ginra shara hkan na mung mare law malawng gaw shi a sasana hkrunlam hpe kabu gara hkap tau hkalum la ai lam nga ai raitim Myen Buddha makam masham hpung masha langai mi pyi n nga ai mare kaw Gawk Ngu Hpara shadun mayu ai lam hpe gaw Rudi mung mare masha ni tsep kawp nra sharawng ninghkap nga re hpe na chye lu ai.