Myen hpyen gumshem dap gaw lai wa sai August praw (6) ya shani kaw nna Man Maw hte Loi Je lapran shagyit shagu hta hkrunlam hkawm mawdaw ni hpe atik anang jep chyoi nhtawm -gu, malu masha kunrai htaw shalai ai lam hpe hkumpat da ai nga nna hkrunlam hkawm masha ni tsun shana ai kaw na chye lu ai.
Kunrai ni lawm ai rai yang rim zingla kau ya ai re hte hkrunlam hkawm masha ni hta lawm ai tsi mawan ni hpe mung zingla kau ya ai lam hkunlam hkawm masha ni tsun ai.
Man Maw hte Loi Je lapran hkrunlam hkawm masha ni hta lai kaga kunrai hpa mung nlu htaw shalai mat sai hte seng ang ai Myen hpyen gumshem dap ni kawn nhtoi (15) ya daram kunrai n-htaw shalai na matu tsun da ai lam nga ai raitim Myen hpyen gumshem dap ni gaw masing nga nga hte ya na zawn kunrai hkumpat ai lam rai nga ai majaw aten na na kunrai htaw akang hkum pat da na hpe gat dut hpaga galaw nga ai mung masha ni hte htaw wa htaw sa bungli galaw nga ai ni myit tsang nga ma ai re.
Ya na zawn Myen hpyen gumshem dap ni n-gu kunrai rai htaw shalai ahkang pat hkum da ai majaw Loije makau grup yin nga Mungshawa ni hte hpyenyen mungshawa ni gaw tam lu tam sha yakhkak nga ai aten kunrai manu ni grau rawt tsaw wa na hpe mung ginra Mungshawa ni myit tsang nga ma ai lam chye lu ai.