Myen hpyen gumshem dap kawn Nmawk hte Manmaw lapran laknak kaba ni hte matut manoi gap gasat nga ai sha n-ga nbungli ni hte mung bawm sa jahkrat, sa gap gasat ding yang rai nga ai hpe shawng lam lit nga ai ni kaw na chye lu ai.
October (24) ya jahpawt hkying (9:45-1:00) daram hta mung Manmaw-Nmawk Deng (3,4) mayan ni hta Myen hpyen gumshem dap ni gap dat ai laknak kaba si (2) gaw grai ngoi gara hkra wa hkrat kapaw ai lam nga ai re hte ya aten dai ginra mayan hta KIA pawnghpawm hpyen hpung ni hte Myen hpyen gumshem dap ni hpyen masa shaja hkat ding yang rai nna gasat poi mung jahkring hkring naw byin nga ai re hte shiga hkum tsup hpe naw matut sagawn nga ai re.
KIA pawnghpawm hpyen hpung ni shara la nga ai Nmawk Deng (7), Awng Mye mare mayan hta October (23) ya shani Myen hpyen gumshem dap ni nbungli hte (5) lang dabat nna bom sa jahkrat, sa gap gap gasat ai sha n-ga Drone hte mung bom (3) lang wa jahkrat gasat let laknak kaba (60,81,120,122)mm ni hte (50) jan lang gap gasat ai re, dai shani hta sha Myen hpyen gumshem dap ni Tank Modo (2) lawm rai hpyen n-gun law law hte KIA pawnghpawm hpyen hpung ni nga shara maga htu shadut htim gasat lung wa ai hpe KIA pawnghpawm hpyen hpung ni hkap shingla gasat dat ai hpang Myen hpyen gumshem dap ni matut htu shadut lung wa ai lam nnga ai sha dai ginra mayan hpyen masa shaja hkat nga ding yang rai nga ai hpe matut chye lu ai.