Manmaw Ginra kata dap jung ai Myen hpyen gumshem dap ni hpe KIA pawnghpawm hpyenhpung ni htim gasat ai February praw (4) ya shani, shata lahkawng du nga sai rai nna, Myen hpyen gumshem maga kawn gaw nbungli hte drone hpe madung lang nna shingla gasat nga ai lam chye lu ai.
Htim gasat majan shata lahkawng laman Manmaw Nbungli Pa, Manmaw Myawk Dap, Manmaw Hpri Gang Dap ni hpe padang dip ai lam nga sai rai nna,ya aten Ts.k.hk (21) hte Hk.L.Y (236) dap hpe KIA pawnghpawm hpyenhpung ni htim gasat shang nga ai lam lit nga ai ni kaw na cye lu ai.
Myen hpyen gumshem dap gaw gasat gala majan nnga ai ginra shara ni hta mung bawm jahkrat gasat ai lam ni adding ding galaw nga ai rai nna, February (4) ya jahpawt 2:00 Am aten daram hta mung Sadung ginwang kata na,Lung Byen kaw Drone bawm wa jahkrat gasat ai majaw masha hkala nba byin hkrum ai lam nga ai hpe sagawn chye lu ai.