Mungmau Ginwang , Nam Um (နမ့်အွမ်) mare kaw MNDAA (Kokang) hpyen hpung ni mare masha ni a Dum Su U Lawng ni hpe jahten shabya kau ya ai sha n-ga, mare masha ni a sun wang ni hpe zing madu la wa ai lam hpe mare masha ni n ra sharawng ninghkap ai lam galaw ai hpe chye lu ai.
Ndai lam hte seng nna, January praw (6) ya shani hta mare hpung rung kaw hpung masha ni hte MNDAA Lit nga SLg, ni hkrum shaga bawngban jahkrup ai lam nga ai raitim kata lam mahtai atsawm n chye lu shi ai re.
Ya na Zawn MNDAA hpyen hpung ni hku na mare masha ni hpe tsun jahkrup ai lam n nga ai sha tinang a myit ra ai hku atik anang galaw ai lam gaw mare masha ni hpe hpa zawn n nawn ai lam re nga nna Ginra masha langai mung shi ningmu hpe tsun ai re.
Ndai mabyin gaw lai wa sai December 4 ya shani kaw nna,Byin hpang wa ai hte MNDAA hpyen hpung ni gaw mare masha ni a Sun Wang ni hta shanhte a hpyen ma ni hpe nga shara jaw na matu galaw ai re nga nna bai nhtang tsun ai lam mung nga ai re.
Ya ten hta ndai mabyin hte seng nna, Nam Um mare Buga na Lit nga SLg, ni hte MNDAA Lit nga SLg, ni kata lam bawngban jahkrup nga dingyang re hpe mung sagawn chye lu ai.