Wunpawng Amyu hte Mungdan sha ni tinang a gam maka hpe tinang dawdan lu ai ahkang aya bai lu na matu laknak lang rawt malan hpang wa ai (65) ning hpring rawt malan nhtoi hpawng lamang hpe, February praw (5) ya jahpawt, Laiza kaw galaw ai lam nga ai re.
Hpawng lamang hta Wunpawng Mungdan Shanglawt Hpung, Ginjaw Komiti Tingyang Up, Du Daju Jum Nban La a (65) ning hpring rawt malan mungga hpe madat hkamla ai lam hte magam gun ladaw (50) ning hpring ai magam gun ni hpe Ginjaw Komiti kaw nna, Ja Dakhkama shagrau sha-a ai lam galaw ai.
Ja Dakhkama shagrau sha-a hkamla ai ni gaw Ginjaw Komiti Tingyang Up Malai-1 Du Daju Jum Gunhtang Gam Shawng, Ginjaw Hpaji Dap Ningpawt Ninghpang Hpaji Matsun Du, Sara Kaba Htawngga Yaw Sau hte Dai Lawn Rung kaw na Lat Du UP Jum Udi Awng ni re.
Daini na rawt malan nhtoi hta, Wunpawng mungdan shanglawt asuya kata, magam gun ladaw (5) ning hpring, (10) ning hpring, (20) ning hpring, (30) ning hpring, (40) ning hpring, (50) ning hpring shagrau sha-a hkam ai magam gun ni yawng marai (1414) rai nna, ndai magam gun ni yawng a matu hte Ginjaw komiti a shawnglam magam bungli ni a matu, rawt malan magam hta shakut shaja nga ai magam gun ni yawng a matu laksan akyuhpyi ai lam mung galaw ai re.
(65) ning hpring Rawt Malan Masat Nhtoi lamang hpe Wunpawng mungdan shanglawt asuya uphkang ginra, ginwang ginjaw shara shagu hte mare buga shagu, Hpaji Jawng ni hte Mungdan shinggan du nga ai wunpawng wuhpung wuhpawng ni mung daini na Rawt malan nhtoi lamang hpe htap htuk manu ai ladat amyu myu hte galaw ai lam nga ai hpe mung chye lu ai.