Sinpraw Ginwang Ginjaw Mai Ja Yang kaw, Ginwang Ginjaw shara (3) kaw na Hkamja Dap magam gun ni hpe Ginjaw Hkamja Dap hte Pan Tsun Development Uhpung Uhpawng ni pawnghpawm nna hkamja dap magam bungli hte seng ai majat wunkat jaw ai lam nga ai re.
Wunkat hpe April (15) ya shani kawn sharin hpang nga ai rai nna ma hkum kanu hte Ma bawngring lam, Num la mazut roi rip makawp maga lam, jahpan chyarang gawn hkang lam ni hpe grau na chye na hkawn hkrang let mungshawa hpe tang du ai tsi gawn lajang lam lu galaw ya lu na matu wunkat hpe galaw ai re lam chye lu ai.
Sharin na ga baw ni gaw Ma hkum kanu hte Ma kaji ni hpe tsang ra ai ana kaw nna tsi gawn lajang ladat, Malu masha ladat ningra wa ai ma kaji ni hpe tsi gawn lajang na lam the MNCH ngu ai jahpan chyarang tang ai ladat ni hpe sharin hpung jat ya na re lam seng ang ai wunkat komiti kawn chye lu ai.
Wunkat hta Ginwang Ginjaw (3) rai nga ai Sinpraw Ginwang Ginjaw, Nmau Ginwang Ginjaw the Dingda Ginwang Ginjaw kata na hkamja dap magam gun ni sa du sharin hkamla nga ai rai nna sharin nhtoi gaw (10) ya sharin sa wa na re lam chye lu ai.