Laiza Muklum kata hpaw sharin nga ai ကချင်ပြည်နယ်ပညာရပ်စုံတက္ကသိုလ်(KSCU) jawng SAS (ဝိစ္စာသိပ္ပံတက္ကသိုလ် ) kaw August (4) ya shani kaw nna, August (7) ya shani du hkra ginsup shingjawng poi lamang hpe galaw ai lam nga ai re.
Jawng ma ni laika sharin ai lam hta sha n-ga ginsup ai a marang e hkumhkrang hte myit masin zet let hkamja na matu, Rawt malan nga ai aten hta jawngma ni hkam sha nga ai myit Ana ni hpe mung shaprai la lu na matu hte jawng ma ni university student life hpe hpring tsup hkra lu la na matu yaw shada ai hte lamang hpe galaw ai lam Sara Kaba Dr. Awng Naing Thu tsun ai.
Ginsup shingjawng lamang hta Fusal gawdin shingjawng lamang, badminton, table tennis hte cane ball ginsup hpan ni lawm ai rai nna ningtawn ai ni hpe kumhpa shagrau ai lam ni galaw sai re. KSCU jawng hta ya aten hpaji sharin nga ai jawngma yawng marai (3000) daram nga ai rai nna, ndai zawn ginsup lamang hpe laning mi hta lahkawng lang woi awn galaw nga ai re hpe mung chye lu ai.