Mungdan hte amyu sha lawt lu lam hta shakut shaja nna asak du baw ap nawng mat wa sai Myu tsaw mung tsaw share shagan ni hpe myit dum hkungga jaw ai share shagan masat ninghtoi hpawng hte wunli la chye ju shakawn hpawng hpe August. 10 ya jahpawt, Laiza kaw galaw ai re.
Hpawng hta ginjaw komiti salang ni hte saw shaga da ai salang ni, Laknak lang rawt malan uhpung ni rai nga ai AA, CNDF, ABSDF ni hte SSP ni, Amyu shayi ni, sa du shanglawm nna, share shagan ni hpe baw gum hkungga jaw ai lam, Wunpawng mungdan amyu sha dawnghkawn hpe baw gum hkungga jaw ai lam, Wunpawng mungdan shanglawt hpung Ginjaw Komiti Tingnyang Up, Du Daju jum Nban La a share shagan masat ninghtoi mungga hpe madat hkamla ai lam galaw ai re.
Share shagan masat ninghtoi hpawng mungga hpe Ginjaw Komiti Amu Madu Salang Kumhtat Hting Nan kaw nna hti ai lam galaw nhtawm, KIC Ningbaw Malai DKB Sumlut Gun Maw kaw nna mungga hpe sanglang tsun jahpra ai lam galaw ai re.
Share shagan masat ninghtoi hpawng hte rau amyu mungdan sha ni hte magam gun ni shut hpyit kau sai mara ni hpe Karai kasang kaw hpyi nem ai lam, share shagan ni hte shanhte ngam kau da ai dum nta masha ni a matu akyu hpyi garum ai lam, matut nna mungdan shanglawt rawt malan magam bungli gunhpai shaja nga ai magam gun ni yawng a matu mung wunli la ai akyu hpyi ai hpawng hpe mung angwi apyaw galaw la lu sai re.