KIA masat 4 Dap ba, Masat 34 Dap dung ginra kata na Tsitkomishin hpung ni shara la nga ai Nga Swi Min Tin hpung gyi jawng hpe Sep 28 ya Jahpawt hkying 10:00 daram hta KIA hpyen hpung ni htim gasat zing la lu ai hpe na chye lu ai.
Gasat poi byin ai shara grup yin de Tsitkomishin hpung ni MI-35 helicopter hte 7 Lang sa gap gasat bun ai sha n ga Jet nbungli hte mung bawm sa jahkrat gasat ai lam nga ai re.
Shana daw hkying 5 daram hta mung, Myo Tar gawng ngu ai kawng kaw KIA hpyen hpung ni hte Tsitkomishin hpung ni gasat poi matut byin ai rai nna, Tsitkomishin hpung ni a sinat laknak padang dip zing la lu ai lam nga ai hte Tsitkomishin hpung ni kawn gasat poi byin ai shara ni de Y12 nbungli hte bawm 15 lang daram wa jahkrat bun nna jet nbungli hte mung bawm 3 lang wa gap gasat ai lam nga ai hpe shawng lam shi sawk ni kaw na chye lu ai.