Masha Hpawng Chyawm Lamang Ni Yawng Hpe Matut Pat Hkum Ai Lam Ginjaw COVID-19 Ana Zinli Makawp Ninghkap Komiti Ndau

Ginjaw Ginra Ginwang Ginjaw hte Sinpraw Ginwang Ginjaw kata lai wa sai laban bat mi laman masha hpawng chyawm hpawng de ai lam pat hkum da ai hta July (18) ya shani kaw ana numdaw kalang mi bai hpang  hkum pat jat dat ai lam  Ginjaw COVID-19 Ana Zinli Makawp Ninghkap Komiti ndau ai hpe mu chye lu ai.

COVID-19 Third Wave aten hta masha hpawng chyawm ai lam n galaw na matu Hpaji Jawng yawng hte nawku makam masham hpawng lamang ni yawng hpe pat hkum da ai re.

Mai Ja Yang muklum kata kaw gaw mare lawk shagu Lockdown galaw nhtawm, COVID -19 tsi jep ai lam, ana kap hkrum ai ni hpe tsi gawn lajang ai lam galaw nga dingyang rai nga ai. July (18)ya shani hte July (19)ya shani lahkawng ya laman ana jep mu lu ai masha marai (104) bai jat wa ai lam, Sinpraw Ginwang Ginjaw COVID-19 Ana Zinli Makawp Ninghkap Komiti tsun shana ai kaw na chye lu ai.

Mai Ja Yang muklum  kata nga ai mungshawa yawng hpe ana jep chyoi ai lam galaw ai hta ana jep mu lu ai masha yawng (300) jan rai nna, marai (58) gaw Negative rai sai majaw laksan shara htawt nhtawn gawn lajang ai lam galaw nga ai.

Ginjaw Hkamja Dap kaw na  Tsi Sarawun ni hte ap nawng Tsi Sarawun marai (23), Lung Chawn ginwang Red-Cross hpung ni Sinpraw Ginwang ginjaw kata na Tsi magam gun ni rau lata gindun nhtawm, Lockdown galaw da ai shara ni hta hpaji jaw, ningmu jahpaw ai lam, tsi gawn lajang ai lam ni hta galaw nga dingyang re.

Ana kap hkrum ai ni hpe gawn lajang na matu, Hpakant kaw nga ai Wunpawng myusha lauban launa ni hte kaga wuhpung wuhpawn ni kaw nna mung ja gumhpraw hte tsi gawn lajang  lang na arung arai ni  garum madi shadaw ai lam nga ai  hpe  chye lu ai.

Laiza kaw gaw masha law nga ai magam dap, makan dap, hpaji jawng, rung ni, gat dut shawa ni hte  hpyenyen dabang ni hkan Swab jep ai lam galaw ai kata Mai sak pa kaw Quarantine hkamla nga ai ni kaw na marai (6) hpe ana jep mu lu ai majaw ya aten dai masha ni hpe Munglai Hkyet kaw tsi gawn lajang nga ai re.

COVID-19 ana zinli  makawp  maga tsi garai nhtu shi ai ni hpe July(19) ya shani kaw nna Numri Pan tsi jaw gawk kaw COVID-19 makawp maga Vaccine htu ya nga ai lam chye lu ai.

COVID-19 ana zinli gaw hkrang nsam galai ai hte lawan dik ai hku nna chyam bra wa nga ai majaw COVID-19 ana zinli makawp ninghkap tara ni hpe marai hkum shagu hkan nang hkan sa makawp maga na matu Ginjaw COVID -19 Ana Zinli Makawp Ninghkap Komiti kaw nna sadi jaw ndau ai lam nga ai re.

Leave a Reply

Your email address will not be published. Required fields are marked *