September (26) ya shana de hkying (3:20) aten daram hta Kata kaw nna Jinghpaw mung de lai lung wa ai Myen hpyen gumshem dap ni a Tank modo (1) hte mali hka lam hku hpyen n-gun hpring hpring htaw ai Hka Sanghpaw masum hpe Chyauk Talung mare lawu kaw Wunpawng Mungdan Shanglawt Hpyen Dap KIA hte dai ginra na mungshawa makawp maga hpyen hpung PDF ni laknak kaba hte hkap shingla gasat ai lam na chye lu ai.
Gap gasat hkrum ai Sanghpaw ni hkring mat n htang mat ai lam n nga ai sha, naw matut lai lung wa ai majaw hkying (3:30) aten daram hta Chyauk Talung mare hte Shwi Pung Ta lapran kaw numdaw kalang bai hkap gap ai lam na lu ai.
Hpakant ginra, Lawa mare, Hkum Tsai Yang mare kaw hpyen n-gun jat ai Myen hpyen gumshem dap ni September (27) ya jahpawt hkying (8:00) aten hta ginra grup yin de laknak kaba gap bang ai nga ai.
September (26) ya jahpawt (8:00) aten daram hta mung laknak kaba gap ai lam nga ai. Ndai zawn Myen hpyen dap ni laknak ya sha ya sha gap bang nga ai majaw majan laja wa na hpe ginra masha ni myit tsang ai majaw Hkum Tsai Yang mare masha ni mare kata nawku jawng ni hta hpyen koi yen nga ai lam na chye lu ai.