Tan Ja Mare Masha Ni Hpe Shana Aten Shinggan Pru Hkawm Ai Mu Yang Gap Sat Na Lam Myen Hpyen Gumshem Ni Tsun Ai

Putao ginra, Tan Ja mare kaw dap jung nga ai myen hpyen gusmhem dap ni gaw mare masha ni hpe shana aten pru hkawm ai lam n galaw na hte pru hkawm ai mu yang gap sat na lam tsun ai hpe ginra masha ni kaw na chye lu ai.

Putao ginra mare makau kahtawng nkau shara ni hta April shata praw kaw nna Myen hpyen gumshem dap kawn hpyen n gun jat, mare kata dum nta ni hta shara la dap jung shara jahkrat hpyen n gun jat ai lam ni galaw nga ai re.

Tan Ja mare hta mung  April (6) ya shani kaw nna hpyen n gun (100) daram re ai hpyen hpung ni kawn mare kata dum nta shagu ngu na hte laika sharin jawng ni hta dap jung shara la nga ai hte shana shinggan le nna gap sat hkrup ai rai yang hpa mung lit la nna n re ngu tsun ai majaw mate masha ni gaw  kadai mung shinggan ngwi le ai hte manghkang byin, jahte tam wa na hpe hkrit tsang nga ma ai re.

Lai wa sai February (1) ya shani kaw nna Putao ginra Sumpyi Yang mare hte Lung Sha Yang mare grup yin ni hta Myen Hpyen gumshem dap ni hte KIA hpyen hpung ni gasat gala majan laja wa ai majaw Sumpyi yang hte kaga makau grup yin mare kahtawng ni Nam de hpyen koi yen hkawm nga ai kaw nna March (22) ya shani kawn seng ang ai wuhpung wuhpang ni kawn bawng ban jahkrup ya ai hte tinang mare dum nta de bai wa nga ai hpang Myen hpyen gumshem ni kawn mare kata hpyen n gun jat, dap jung shara la ai lam ni galaw nga ai ai majaw majan kalang bai byin wa na hpe ginra masha ni myit tsan nga ai lam na chye lu ai.

Leave a Reply

Your email address will not be published.