Manmaw Ginwang Ramma Magam Dap kawn woi awn ai hte June (9) ya shani kaw nna (11) ya du hkra Laiza buga Hkalup Hpung, Htoi Ninghkawng Gawknu kaw 2021-2022 hpaji ladaw hta Tsang shi awng da sai ramma ni a dakkasu shachyen sharin hpawng galaw la lu sai re.
Ndai masing gaw Manmaw ginwang kata shaning shagu galaw nga ai magam bungli raitim lai wa sai lahkawng ning hta gaw covid ana zinli hte mung masa lam amyu myu a majaw n lu galaw mat re,tinang ginra kaw nga ai dakkasu ni hpe sha shachyen ya ai n re sha kaga maigan dakkasu ni a lam, Hkritsan ramma langai a sak hkrung lam, makam hte sak hkrung lam hpe gaw gap sa wa lu na matu sharin ya ai re lam Manmaw Ginwang Ramma Hpa-awn Saranum Lagaw Bu Bu tsun ai.
Myen mungdan kata shuk shanut nga ai masa lam ni a lapran anhte Ginra hta Tsang shi ninggam hpe awng la lu ai gaw karai a laksan shaman chyeju re ai, hkritstan re ai hte maren ramma ni a sak hkrung lam gaw hkritsan sak hkrung lam hte bung pre hkra sakhkrung nga ga,Teng man ai hte tara rap ra ai lam hta ngang ngang tsap sa wa ga nga nna Saranum hpaji jaw da ai.
Sharin hpawng hta pre marriage hte seng ai lam hpe Rev. Lahpai Naw Seng, KBC Ramma Magam Dap a lam KBC Ramma Hpa-Awn Sara Sabaw Naw Din, hpaji hte ningbaw ningla ngu ai ga baw hpe KBC Amu Madu Rev. Hpauyawng Tu Mai, Ramma hte Nawku Hpung a lam Sara Lahpai Zau Tang, Hpaji hte Tinang Amyu/ Mungdan gaw gap ai lam Sara Aung Ko Ko Lin, laksan hku nna ramma ni hpe Du Kaba Sumlut Gun Maw kawn hpaji jaw la ai lam ramma komiti kaw na chye lu ai.
Ramma langai a hkritstan sak hkrung lam hpe atsawm chye na ai hte ramma langai a lit ni hpe grau chye na wa ai lam sa du sharin hkam la nga ai jawngma ni tsun ai.
Sharin hpawng hta Laiza hte jarit mayan na tsang shi ninggam hpe awng da ngut sai ramma marai (60) daram shang lawm let sharin hkam la lu sai re.