Za Nan hka mahkrai pawt kaw June (10) ya jahpawt hkying (5:15) aten hta Myen hpyen gumshem dap hte KIA hpyen hpung ni gasat poi byin ai lam nga ai.
Sumpra Bum maga de na yu wa ai Myen hpyen gumshem dap hte P.T.Ts pawnghpawm hpyen hpung ni KIA ginra de htu shadut shang wa ai majaw Za Nan Hka mahkrai pawt kaw du ai aten KIA hpyen hpung ni hkap shingla gasat ai kawn gasat poi byin wa ai rai nna gasat poi hta Myen hpyen gumshem dap hte P.T.Ts hpyenla nkau si hkala hkrum ai lam nga ai hpe na chye lu ai.
KIA Masat (2) Dap Ba, Masat (43) Dap Nawng Dap Dung ginra hta mung dai jahpawt hkying (6:40) aten daram hta Lido lam hku hkan nna Kawng Ra mare maga de chyinglau shang wa ai Myen hpyen gumshem dap Hk.M.Y (390) hte Hk.L.Y (86) pawnghpawm n-gun (100) grup yin lawm ai hpyen hpung hpe mung Nam Hpyek mare baw kaw KIA hpyen hpung ni bawm hte hkap shingla gasat dat ai lam nga ai.
Bawm hte hkap shingla gasat hkrum ai hpang Myen hpyen gumshem dap hpung ni makau grup yin de laknak kaji kaba gap bang ai lam nga ai sha n-ga jahpawt hkying (9:00) kaw nna Ting Kawk Myen hpyen gumshem dap Hk.M.Y (382) ni hte Nam Hpyek hpyen dap Hk.M.Y (390) ni kawn lai wa lai sa Modo, Sengke yawng hpe pat hkum da ai lam nga ai re.
KIA Masat (9) Dap Ba, Masat (26) Dap Dung ginra, Nawng Lut ginwang, Mai Nawng Ja Maw mayan kaw June (10) ya shani hkying (12:15) aten hta Myen hpyen gumshem dap Hk.M.Y (111) hte Hk.L.Y (42) pawnghpawm hpyen hpung ni KIA hpyen hpung ni nga ai shara de shamu shamawt shang wa ai majaw KIA hpyen hpung ni hkap shingla gasat ai kawn gasat poi byin nga ai lam chye lu ai.
