Seng Tawng mare na Myen hpyen gumshem Balik Dap hpe December (6) ya jahpawt hkying (8:40) aten daram hta KIA hpyen hpung ni Drone hte bawm sa jahkrat gasat ai lam nga ai.
KIA hpyen hpung ni sa jahkrat ai Drone bawm gaw Balik dap wang kaw wa hkrat kapaw ai re majaw marai (1) si sum nna marai (5) hkala hkrum ai lam nga ai hpe mung sagawn chye lu ai.
Dai Balik dap ni gaw Myen hpyen gumshem dap ni a lagaw lata tai ya nna bungli galaw ya ai sha n-ga shanhte hte rau lai wa sai bat laman hkan Seng Tawng mare, Sabaw mare hte dai ginra mayan hkan shamu shamawt nga chying lau hkawm ai lam ni galaw jahkring hkring galaw ai re majaw ya na zawn KIA kawn gap gasat ai lam rai na masa nga ai nga nna ginra masha nakau tsun nga ma ai re.