Lahta Sammung, Mungmyit Sinli Ga, Mungmyit Ginwang, Nam San Human, Man Hpat mayan hkan December (7) ya shana de hkying (3:00) Pm aten daram kaw nna Myen hpyen gumshem dap ni htu shadut htim gasat wa ai majaw TNLA laknak lang rawt malan hpyen hpung ni hte laja lana gasat poi byin ai lam na chye lu ai.
Myen hpyen gumshem dap ni gaw hpyen n-gun tsa kaba hte hpyen man law law hpaw nna lagaw lam hku htu shadut htim gasat nga ai sha n-ga Jet Nbungli, Helicopter ni hte mung laja lana htim gasat nga ai lam na chye lu ai.
December (8) ya jahpawt hkying (4:50) aten daram kaw nna mung Myen hpyen gumshem dap ni lagaw dap, Nbungli ni hte laja lana htim gasat nga ai re, gasat poi byin ai shara de Mandung hte Nam San Myen hpyen gumshem dap ni laknak kaba gap bang ya nga ai hta dum nta nkau hten za mat ai lam matut sagawn chye lu ai.
Mungmyit Sinli Ga ginra hta Myen hpyen gumshem dap ni lai wa sai shata lahkawng masum kaw nna shani shagu hpyen n-gun jat ai lam, hpyen lang rung rai hte malu masha htaw shalai la ai lam ni galaw nga ai majaw KIA Masat (4) Dap Ba, Masat (6) Dap Ba hte Masat (10) Dap Ba ginra shara shagu hta Myen hpyen gumshem dap hte KIA, MNDAA ni gasat poi jahkring hkring byin nga ai re.