Kachin Sub-state, Mung Myit Sinli ga, Kuthkai ginwang Jinghpaw Wunpawng Htunghking hte Laili Laika Komiti kaw nna lit la hpaw sharin nga ai Ga Leng Zup Awng lapran tsang jawng hpe June (23)ya shana TNLA hpyenhpung ni hpyen n gun hte sa pat hkum kau ai lam nga ai re.
TNLA hpyenhpung ni N gun (50) grupyin mawdaw hte shana 9:30 pm ten hta jawng wang kata du shang wa nna, jawng kata na magam gun ni yawng hpe wang kata na gawt shapraw ai lam, n pru ai ni hpe rim woi mat na lam tsun jahkrit shama nna, jawng gawk chyinghka ni yawng hpe mung adup pat kau da ai lam, jawng magam gun ni kaw na chye lu ai.
Jawng wang kata na Wunpawng Mungdan Amyusha Dawnghkawn hpe mung zing mat wa ai lam galaw ai rai nna jawng hpaw sharin na rai yang TNLA hpe ahkang hpyi nna masat ya tara kata kaw hpaw ra ai lam mung tsun kau da ai lam nga ai hpe na chye lu ai.
Ga Leng Zup Awng lapran tsang jawng gaw Shanglawt Asuya jawng hku nna lai wa sai hpaji ladaw ni hta mung hpaw sharin dingyang rai nga ai jawng rai nna, daining na hpaji ladaw kawn jawng bai hpaw sa wa na matu hpang ai kaw na TNLA kawn sa pat hkum dingbai dingna jaw nga ai jawng mung re.
Ndai jawng hta Ginra kata na jawngma ni marai (300) jan hte KIO hpaji dap na sharin sara magam gun ni marai (20) grupyin ap nawng nga ai jawng mung re. Ndai mabyin lam hte seng nna, Ginjaw hpaji dap kaw nna seng ang ai ni hpe tang madun da ai lam ni nga ai hpe mung na chye lu ai.