KIA Masat (2) Dap Ba, Masat (20) Dap Dung kata kaw na KIA hpyenhpung ni March (31) ya shani Lawa mare kata hpyen gasu shang shara la nga ai Myen hpyen gumshem dap ni hpe htim gasat gawt shapraw kau sai lam chye lu ai.
Ndai Myen hpyen gumshem dap kata Myen hpyen gumshem dap hpyenhpung sha n ga, gumshem dap a lakung lakap ni rai nga ai Min Zay Tant PTTs hpyenhpung ni, Sam hkyeng laknak lang hpung ni lawm ai re.
Ndai hpyenhpung ni gaw lai wa sai March (21)ya shani hpyen man masum hte Lawa mare kata de hpyen gasu shang wa nna, mare kata, hpaji jawng ni hta shara la nhtawm grupyin de hkrup mara sinnat gap dumbre shang wa ai majaw ginra masha ni tinang shimlum dum ai shara ni de hpyen koi yen nga ai re.
Ya aten dai hpyenhpung ni Ka Mai maga de hprawng yen mat wa sai raitim, Majan matut byin wa na hpe myit tsang ai majaw mare masha ni mare sin langai lahkawng hta lai mare de nwa gwi ai sha matut hpyen koi yen nga ma ai lam mung na chye lu ai.