Shwegu kaw nna Manmaw de lung wa ai Tsitkomishion sanghpaw hpung nkau mi hpe KIA pawnghpawm hpyen hpung ni gasat shagrawt kau lu magang sai lam shawnglam lit nga ai salang ni kaw na chye lu ai.
Tsitkomishion sanghpaw hpyen hpung gaw September praw (2) ya jahpawt Shwegu kaw nna mungshawa sanghpaw kaji ni hte kayau gaya ninggang shatai let, sanghpaw yawng (20) jan hte Manmaw maga de rawt lung wa ai re.
Ndai sanghpaw hpung ni hpe Zin Bung hte Sin Hkan lapran kaw KIA pawnghpawm hpyen hpung ni hkap shingla gap gasat ai hta sanghpaw kaba langai lup mat nna, langai gaw wan hkru mat ai lam chye lu ai
Sin Hkan lawu kaw mung sanghpaw langai bai gap jahten kau ya lu ai hte sanghpaw lahkawng gaw hkinggau shakap nna rim hkam mat ai lam nga ai hpe mung na chye lu ai.
Ningshawng scott hkawm ya ai speed board lahkawng gaw Sin Hkan mahkrai lahta de gawt lai lung wa ai hpe KIA pawnghpawm ni kawn Mya Le shara kaw shachyut gap nga ai lam mung na lu ai re.
Sanghpaw hta jawn lawm ai masha nkau hka de gumhtawn bang mat nna bawng masha yawng marai latsa jan hpe rim zing da lu ai lam na lu ai raitim tup hkrak gaw shiga garai n lu shagrin ai lam hteNgam ai sanghpaw ni hpe mung ganghkau nbungli hte nhkring n sa makawp gap ya nga ai lapran, Zin Bung hte Sin Hkan mahkrai lapran kaw naw gap gasat nga dingyang re lam shawnglam lit nga ai salang ni tsun shana ai.
Lai wa sai bat hta mung Shwegu lawu maga daw kaw sanghpaw langai zing kau lu nhtawm langai hpe gap nat jahten kau lu ai lam nga sai hpe mung chye lu ai.