September (8) ya hte (9) ya shani lahkawng ya laman hta Tsit Komishin sanghpaw (5) hpe gap jahten kau ya ai lam shawnglam shi sawk ni kawn chye lu ai.
September (8) ya shana gaw Mandalay, Katha maga na lung wa ai sanghpaw (2) Shwigu daru kaw jahkring da ai ten KIA pawnghpawm hpung ni kawn drone hte gap jahten kau ya nna sanghpaw wan hkru htenza mat ai re lam chye lu ai.
Dai sha n-ga September (9) ya shana daw daram hta mung Manmaw maga na yu wa ai sanghpaw ni hpe Zin Bung shara gaiwang du ai hte KIA pawnghpawm hpyen hpung ni gap gasat ai majaw sanghpaw (2) wan hkru htenza mat ai re hte ngam ai langai gaw hka de lup mat ai re lam shawnglam shi sawk ni kawn sakse sumla hte rau shagrin tsun da ai re.
Tsit Komishin dap ni gaw Manmaw maga de hpyen n-gun jat bang na matu lai wa sai August shata (21) ya shani kaw nna dai ni du hkra numdaw (2) lang ngu na sanghpaw hte masha n gun, malu masha ni htaw sa nga ai re lam chye lu ai.