Manmaw kaw up rawng nga ai Tsitkomishin Dap ni Kawng Ja Yang maga de hpyen shamu shamawt lung wa ai hpe September 13 ya shani KIA pawnghpawm hpyen hpung ni hkap gasat padang dip la lu ai lam shawng lam shi sawk ni shana wa ai kawn chye lu ai.
Hk.L.Y 47 dap kata na ngu maram da ai Tsitkomishin hpyen hpung ni gaw Kawng Ja Yang mare na Hein Aung Sau Pamp seng maga de htu lung wa ai hpe KIA Pawnghpawm hpyen hpung ni hkap gap gasat ai hta Tsitkomishin dap ni si hkala law nna, sinat machyu pala law law hpe mung zing madu la lu ai re.
Si hkala law ai Tsitkomishin hpyen hpung ni gaw ya aten Kap Pa Ni ngu ai shara de bai htingnut nga ai lam, dai shara kaw hkala hkrum ai ni hte rau hkring nga ai hpe KIA pawnghpawm hpyen hpung ni drone, sinat kaba ni hte ding yang gap nna, hpyen masa ni hpe maram nga ai lam chye lu ai.
Gasat gala majan byin ai shara hte hpyen sanghpaw bai nhtang yu wa ai shara ni kaw Tsitkomishin dap gaw hpyen gasat nbungli hte gap gasat garum ai lam hpe mung ding yang galaw nga ai re.